غريب !!

[محمد صفوق]

غريب وافكاري :وطن، واحلامي احلام مْهبول = صوتي ذبل قبل الحكي وسْنين عمري سالفة
ياصاحبي ليت الزمان ليا عبس عنده حلول = اوكان باحضان المكان القى الصور متخالفة
هيجبنت برجوم العطش ياقسوة احساس الذبول=أرقبت ادور لي سطر واثري الدفاتر بالية
اوراق من روض الحياة اللي عثت فيه المحول =ماتت حروفه وازهرت فيه الطعون السالفة
ياوجه بعثر غربتي عقب ارتحالي وش تقول ؟=مليت من حفظ الكلام اللي صداه يخالفه
تعبت من شرب الظما ،تعبت من كثر المثول = قدام وجهي احكايتي واهدافي المتخالفة
احس في صدري حكي وقعه مثل دبك الخيول = لكني اكبح نزوته وامواجه المتحالفة
الوذ في صمتي زمن ،عن كلمة ٍ فيها فضول =واصفّق دلال الزعل وأسد عين الخالفة
من شان ماتدخل علي فزعة عديمين الأصول =ومن شان ارتّب دفتري والقى طريقٍ آلفه
وأرقى على برج السما وان حانت اوقات الهطول =ابلل كفوف الثرى وتصير عندي سالفة !!

[محمد صفوق]

انسان ينزف ألم ، وحْروفه دموع = وابياته بْحور واحساسه شراعه

يكتب عن الجوع لو ماضامه الجوع = لأنه يْحس بآلام المجاعة

كم حلم ضايع غدا راعيه مفجوع = استشعره ، واصبح يْعاني ضياعه

يستعذب الحب لوهو منه موجوع = ويْنزهه عن مطامين المياعة

مطبوع بالصدق قولوا عنه مصنوع=أنعم بصنعة شعوره من صناعة

ماوده يْصير بالاسفاف مطبوع = ماغيّرت موجة الموضة طباعه

مايفتعل كل طلعة شمس موضوع = عشان يكتب قصيدة كل ساعة

شعره شعوره، وبعضٍ منه منزوع = يحكي همومه وشكواه وصراعه

ياكثر من يشعلون ابياته شموع = في ليلهم ،والدجى يعلن وداعه

تهتف له جْموع لو مايعجب جْموع = مايطرب الزامر اسماع الجماعة

لاصار صوته من اهل الذوق مسموع = ماينتظر من - عديمينه- قناعة

يكفيه مايكتب الا ان كان مدفوع= من همّ قلبه وشوقه واندفاعه

مرات يصبح حبر نجواه ينبوع = ومرات يعجز ولافيه استطاعه

سمّوه مصروف أو سموه ممنوع = هذا قصيده وذي بصمة يراعه

[محمد صفوق]

وش فيه قلبك علي مليان غيظ وزعل = وأنا أكثر اللي تجاهل رغبته وافتداك



لا تحسب إني تجاهلتك لأني نذل = لكن ، رحمتك ولاحبيت أجازف معاك



كنت أدري إنك تبي تجمع معاي الشمل= ماني غبي يوم ما افهم - وقتها - مبتغاك



لكن ظروفي - على وقتك - تفتت جبل= ولا ابيك تحمل معاي اللي يسبب شقاك



كنت ببداية حياتي والمصاعب :زمل= مالي جدى يوم أداحمها وألبّي نداك



وأخاف أضيّع سنينك ،لين أعوّد جمل = وادحم بزوري جْمالٍ ضارية للعراك



قلت أترِكَك بالمكان اللي عرفتك طفل = به ، واندمجت بتضاريسه وفوقي سماك



كان المصاب بهروبي وابتعادي جلل = لكنه أهون من احساسي بخيبة رجاك



شف كيف! صار القرار (المر) مثل العسل!= من قالوا إنك لقيت اللي يقدّر (حلاك)



مرت بي سنين والصورة بعيني :طلل = أخذ علومك - بخِفْيَة - من حديث أقرباك



واليوم جتني سوالف ،لكن المحتمل = تكون فاهم غلط أو فيه شي ايخفاك



سمعت ناسٍ تقول إنك تحسّ بملل = لامرك اسمي ! وتبدي مايخالف رضاك!



معقول !! شايل على قلبي بليا علل !؟ = لله بالله، يعني من خلاك بخلاك



أو صرت ماتَعْرِف للّفت انتباهي سبل = إلا انك تْحط قلبي تحت رحمة رحاك!



يازارع الورد ، وردك بالحشا ماذبل = كانك سقيته عتب ، من تضحياته سقاك



هذا جزا موقفي !!؟ واللي لقلبي حصل؟!! = أموت أدور دْواك وتتهمني بداك!؟



ياصاحبي نظرتك للوضع فيها خلل = فكّر بها زين ، تلقاني هِناك وهِناك



أحاصْرَك بالعطا من غير ما اشكي كلل = وانت تْحسبني (قليّل) خاتمة مع هواك



أنا هنا ، يا أول عيون ٍ عطتني أمل = أراقْبَك - وانت ما تدري- واحنّ لدفاك



لذلك أرجووووك لاتحمل بقلبك زعل = تجاه من باع نفسه للظما وافتداك