سحر العيون

[فهد العيفاني]

لي حبيبن من فراقه ولع بجوفي جمر
كاتمن جرحي وانا ياويل قلبي من فراقه
لا بغيت اصبر عجزت,,,اتحلى بالصبر
حسبي الله كان صده دون ذنب ودون عاقه
لانتهيت وقلت يمكن دقت ساعة الصفر
يندفن جرحن وجرحن ايتثارا في مساقه
لا صنعنا طايرات ولا وصلنا للقمر
... ولا تركنا للجمل ولا ظفرنا لو بناقه
مشكله ونسياه اعظم من شقك للصخر
مشكله واليوم حتى صحبته صارت شفاقه
هو بشر بس عندي غير عن كل البشر
في تصرفه ,,,, وهدوءه ويتكلم بلباقه
لا بغيت اوصفه اكذب اذا قلت القمر
القمر يوصف عليه ببدره بليلة اشراقه
مشيته ..ممشاه ضحكه مطربات للنظر
يسحرك سحرالعيون اللي حواجبها رقاقه
مثل زهرة ياسمين انورت ساعة فجر
او كما عسل سدر صافي وحلون مذاقه
ولا تكلم من كلامه يقلبك فوق وحدر
يجذبك حسن الكلام ويجذبك حسن انسياقه
في وصوفه تقضي الاوراق ويجف الحبر
هذي باقة ورد وحده,,, من ملايين باقه
ليلتن تقضيه معها من ليالي بالعمر
ما تساق الا لواحد حظه يباري مساقه